Ministri i Brendshëm, Taulant Balla ka reaguar pas megaoperacionit të zhvilluar nga policia dhe SPAK, ku janë shpallur në kërkim 3 persona për trafik droge, si dhe u arrestua shefi i komisariatit të Laçit. Aksioni i sotëm ishte vijimsi e operacionit “Flakë në det”. Gjatë aksionit të sotëm policia ka rrethuar banesën dhe lokalin e Gëzim Çelës në Fushë Kuqe, i njohur si “baroni” i drogës.
“Vijon intensivisht procesi i vetë-pastrimit të Policisë së Shtetit. Policia e Shtetit në bashkëpunim me SPAK kanë arrestuar sot pasdite Shefin e Komisariatit të Policisë Kurbin, i cili dyshohet për bashkëpunim me drejtuesit e një grupi kriminal, ndaj të cilëve janë lëshuar gjithashtu urdhra arresti.
Forcimi i bashkëpunimit mes agjencive ligjzbatuese dhe lufta e përbashkët për spastrimin e vatrave të krimit përballë dhe brenda vetë organizatës së Policisë së Shtetit, do ta çojë Shqipërinë në një tjetër nivel të sundimit të ligjit”, shkruan Balla.
