Deri tani SHBA renditet e 3 në rang botëror për numrin e viktimave dhe të infektuarve nga COVID-19, pasi numëron 40, 927 të prekur dhe 484 viktima.
Mirëpo, sot zyrtari shëndetësor i qeverisë amerikane, Dr. Jerome Adams, dha të hënën një mesazh të zymtë, duke paralajmëruar se gjendja e Coronavirusit në vend do keqësohet.
“Dua që Amerika të kuptojë se këtë javë gjendja do të keqësohet, duke paralajmëruar se një pjesë e njerëzve nuk po e zbatojnë si duhet distancimin social. Shumë njerëz, mendojnë se kjo nuk mund t’u ndodhë atyre. Duam që me çdo kusht secili të qëndrojë në shtëpi,” -tha ai në një intervistë për NBC.
Shtetet e Bashkuara janë pothuajse në gjysmën e periudhës 15-ditore, në të cilën sipas planit duhet të zbutet ndjeshëm numri i rasteve me Coronavirus, teksa qeveria dhe të dyja dhomat e Kongresit po nxitojnë për të siguruar miratimin e një plani financiar i cili të shmangte një sfidë të rëndë ekonomike dhe të ndihmonte me para dhe kredi amerikanët që humbasin punën dhe bizneset.
Presidenti Donald Trump sugjeron që udhëzimet për distancimin social të zbuten në mbarim të periudhës 15-ditore, edhe pse deri tani janë të paktë ekspertët shëndetësorë që mendojnë se kjo periudhë mjafton për të ditur nëse masat e vetizolimit e kanë ulur fuqinë e përhapjes së Coronavirusit.
Në një status në Twitter, Trump shkruante se “Ne nuk mund të lejojmë që ilaçi të jetë më i rëndë se sa vetë problemi. Në mbarim të periudhës 15 ditore, – shkruante ai, – do të marrim një vendim se cilën rrugë do të zgjedhim.”
SHBA ka nisur testimin e parë të vaksinës kundër Coronavirusit dhe një grup prej 45 vullnetarësh të shëndetshëm do të bëjnë injeksionin në Institutin Kërkimor “Kaiser Permanente”, në Seattle.
Sipas ekspertëve duhen shumë muaj për të ditur nëse kjo vaksinë, apo dhe të tjerat për të cilat po punohet, do të funksionojë.
Në rang botëror deri tani janë shënuar 16,121 viktima dhe janë regjistruar 368,846 të infektuar në 162 shtete, ndërsa në vendin tonë deri tani ka humbur jetën 4 person dhe janë infektuar 104 të tjerë, teksa në Kosovë janë 35 persona të infektuar me COVID-19.
