Koronavirusi kinez është bërë tashmë tema kryesore e të gjitha mediave botërore, pasi rreziku nga ky virus paraqitet i lartë.
Fatmirësisht në vendin tonë deri më tani nuk është diagnostikuar asnjë person me koronavirus, kjo edhe për shkak se Shqipëria nuk ka linjë direkte ajrore me Kinën.
Ndërkohë, kur të gjithë pyesin se çfarë është ky virus, Qendra për Kontrollin dhe Parandalimin e Sëmundjeve në Atlanta, Shtetet e Bashkuara, ka shpërndarë imazhin e morfologjisë ultrastrukturore (struktura që nuk është e dukshme me mikroskopin optik, por vetëm me mikroskopët elektronikë dhe jonikë më të fuqishëm) të koronavirusit.
Eshtë ky virusi i identifikuar si shkaku i epidemisë së sëmundjes së frymëmarrjes që shpërtheu në Wuhan, Kinë.
Sipas të dhënave të publikuara nga Organizata Botërore e Shëndetit, vdekjet e shkaktuara nga koronavirusi janë 213.
Ekzistojnë 9776 raste të konfirmuara në Kinë, 12.167 raste të dyshimta, rreth 100 000 nën kontroll dhe 1.370 pacientë në gjendje të rëndë, shkruan ‘Daily mail’.
Për sa i përket Europës, ka dymbëdhjetë raste të konfirmuara, pesë në Francë, një në Finlandë, katër në Gjermani dhe dy në Itali. Ndërkohë Turqia dhe Britania kanë dërguar avionë në Kinë për të evakuuar shtetasit e tyre atje.
