Zëvendësndihmës sekretari Amerikan për Çështje të Evropës dhe Euroazisë, Gabriel Escobar ka reaguar për situatën në Kosovë.
Escobar e ka quajtur sukses të madh arritjen e marrëveshjes së sotme në Bruksel mes Kosovës dhe Serbisë.
“Është një sukses i rëndësishëm arritja e sotme e marrëveshjes në Bruksel. Dialogu i lehtësuar nga BE-ja po ndihmon në gjetjen e zgjidhjes për të dyja vendet. Dua të falënderoj emisarin Miroslav Lajçak dhe ekipin e tij për punën e madhe që kanë bërë sot”- ka thënë Escobar.
Ai më tej është pyetur edhe nëse SHBA-ja ka qenë e njoftuar paraprakisht për vendosjen e masës së reciprocitetit për targa. Escobar ka theksuar se është e drejtë e Kosovës të aplikojë reciprocitetin.
“Është e drejtë e Kosovës të aplikojë reciprocitetin. Jam i lumtur që kemi arritur marrëveshje për shtensionim të situatës”- tha Escobar.
Kujtojmë se mbrëmjen e djeshme u njoftua se u arrit një marrëveshje për sa i përket çëshjtes së reciprocitetit të targave. Zëvendëskryeministri i Kosovës, Besnik Bislimi së bashku me Lajçak vendosën që policia e Kosovës të tërheqë Njësitë e Posaçme Speciale, ndërsa Serbia do të heqë barrikadat e vendosura nga protestuesit brenda një afati kohor prej tetë orësh të vendosura nga palët. E gjithë situata e tensionuar u krijua në veri të Kosovës vetëm nga vendimi që mori qeveria në lidhje me vendosjen e targave të përkohshme për automjetet kur kalojnë në territorin Kosovar.
