Shtetet e Bashkuara të Amerikës kanë ndërmarrë një seri sulmesh ajrore ndaj bazave ushtarake në Venezuelë, duke goditur edhe zona brenda kryeqytetit Karakas. Sipas informacioneve paraprake, një nga objektivat kryesore të sulmuara ka qenë Fortesa Tiuna, e vendosur në pjesën jugore të qytetit.
Fortesa Tiuna konsiderohet kompleksi më i rëndësishëm ushtarak i Venezuelës dhe strehon Ministrinë e Mbrojtjes, Akademinë Ushtarake si dhe struktura të tjera kyçe të forcave të armatosura. Si pasojë e bombardimeve, janë raportuar ndërprerje të energjisë elektrike në disa zona përreth. Shpërthimi i parë është regjistruar rreth orës 01:50 të mëngjesit sipas orës lokale.
Pamje që po qarkullojnë në rrjetet sociale tregojnë helikopterë ushtarakë duke fluturuar mbi Karakas, ndërsa deri në këto momente nuk ka pasur një reagim zyrtar nga autoritetet amerikane apo ato venezueliane mbi zhvillimet në terren.
Presidenti i Venezuelës, Nicolas Maduro, ka shpallur gjendje të jashtëzakonshme pas sulmeve ajrore, duke i cilësuar ato si një “agresion shumë të rëndë ushtarak” nga Shtetet e Bashkuara ndaj vendit. Në një deklaratë zyrtare, qeveria venezueliane akuzoi SHBA-në për sulme ndaj Karakasit dhe shteteve Miranda, Aragua dhe La Guaira.
Pas shpalljes së gjendjes së jashtëzakonshme, Maduro ka urdhëruar gjithashtu zbatimin e të gjitha planeve kombëtare të mbrojtjes, në përputhje me kohën dhe rrethanat e krijuara.
Ndërkohë, ka reaguar edhe presidenti amerikan Donald Trump, i cili deklaroi se Shtetet e Bashkuara kanë kryer një sulm në shkallë të gjerë ndaj Venezuelës në orët e para të mëngjesit. Trump njoftoi se presidenti venezuelian Nicolas Maduro është kapur dhe është nxjerrë jashtë vendit së bashku me bashkëshorten e tij, Cilia Flores.
Sipas tij, operacioni është realizuar në bashkëpunim me agjencitë amerikane të zbatimit të ligjit dhe detaje të tjera do të bëhen publike në vijim. Trump shtoi se kapja e Maduros është kryer nga Delta Force, njësia elitare speciale e ushtrisë amerikane.
Pas këtyre zhvillimeve ka reaguar edhe ministri i Mbrojtjes i Venezuelës, Vladimir Padrino Lopez, i cili përmes një video-mesazhi të publikuar në rrjetet sociale ka deklaruar se Venezuela do t’u rezistojë trupave të huaja dhe se forcat e armatosura janë të gatshme të mbrojnë sovranitetin e vendit.
