Zgjedhjet presidenciale në SHBA vazhdojnë të mbajnë të mbërthyer vendin më të fuqishëm të botës në ethe, pasi ende nuk është përcaktuar se si do të jetë fitorja dhe cili nga kandidatët.
Por ajo që shikohet deri më tani, është fakti se Joe Biden, është vetëm 6 vota elektorale larg fitores së madhe në SHBA.
Kandidati për President ka shkuar në 264 vota elektorale sipas “Exit Poll” të “AP”, teksa Trump ka mbetur në 114.
Numërimi vijon në disa shtete teksa duket se, do të pritet dhe disa ditë në rast se një prej kandidatëve nuk plotëson kuotën e 270 votave elektorale që shpallin fituesin.
Shtetet ku po luhet fati i zgjedhjeve janë Pensilvania, Karolina e Veriut, Xhorxhia, Alaska dhe Nevada. Në katër të parat kryeson Trump, teksa tek e fundit Biden.
Këto do të mbahen mend si një nga proceset zgjedhore më të debatuara dhe kontestuara në histori të SHBA-ve, fill pas deklaratës së Trump se: “zgjedhjet po vidhen”.
Edhe sot, Trump ka shprehur pakënaqësi duke shkruar se, “Avokatët tanë kanë kërkuar ‘qasje kuptimplote’, por çfarë dobie ka kjo? Dëmi është bërë tashmë në integritetin e sistemit tonë, dhe në vetë Zgjedhjet Presidenciale. Kjo është ajo që duhet diskutuar!”.
Pikërisht akuzat filluan për votën me postë, që pritej të favorizonte demokratët, kurse Trump kishte rezerva për të pasi e konsideronte si jo të sigurt.
Gjithsesi Trump-i ka paralajmëruar se do e çojë në Gjykatë çështjen e zgjedhjeve dhe ajo do të marrë një verdikt final për to në rast se ndodh.
/GazetaReforma.com/
