Te Kosova e kanë të qartë, pas mungesave të Rashicës dhe Zenelit, verdheblutë duhet ta mbushin këtë boshllëk me futboll kolektiv.
Traineri Bernand Shaland ishte i qartë përpara medias vendase ku foli për sfidën ndaj Republikës Ceke.
“Ne nuk do të bëjmë zëvendësime individuale. Nuk e klonojmë dot Rashicën dhe Zenelin, prandaj duhet të punojmë shumë si ekip në këto dy ndeshje. Kjo është zgjidhja ime, duhet të punojmë shumë si ekip. Duhet të bejmë një lojë të çmendur”, tha zvicerani që drejton “dardanët”.
Sa i përket formacionit ai nuk e zyrtarizoi atë, por kjo nuk e pengoi që të fliste me superlativa për Rashani’n, i cili mesa duket do të jetë në fushë nga minuta e parë.
Mirëpo mungesat e Rashicës dhe Zenelit janë një rast i mirë për Bernard Berishën. që pasi la Skënderbeun, aktivizohet te Akhmat Grozny.
Berisha shpreson që formën e mirë të cilën po e kalon në kampionatin rus, ta sjellë edhe në kombëtaren e Kosovës.
“Gjithmonë është kënaqësi të jem pjesë e Kosovës.
Shpresoj të më jepet mundësia për të luajtur, duke e ditur që nuk më është dhënë në asnjë ndeshje zyrtare në këto eliminatore.
Trajneri e di që është momenti im. Shpresoj që do të luaj për Kosovën dhe shpresoj që do të arrijmë një fitore”, e mbylli Berisha.
