Ish-kryeministri Sali Berisha po organizon referendumin në të gjitha qytetet e vendit, ku tashmë ka nisur votimi për shkarkimin e kreut aktual dhe rithemelimin e PD, vendime që u morën në Kuvendin e 11 dhjetorit.
Berisha mesa duket ka sfiduar Shtetet e Bashkuara të Amerikës edhe ditën e sotme, teksa po zhvillon referendumin për shkarkimin e kreut të Partisë Demokratike, Lulzim Basha.
BalkanWeb raporton se Berisha ka vendosur të hapë qendër votimi në derën e ambasadës amerikane në Tiranë.
Pikërisht në këtë qendër do të votojë edhe vetë Sali Berisha. Ky i fundit ka nisur përballjen me SHBA, që kur DASH e shpalli atë “non grata” për korrupsion.
SITUATA NË QARQE
Në Gjirokastër janë gjithsej 1100 anëtarë demokratë me të drejtë vote në Bashkitë Gjirokastër, Libohovë dhe Dropull, të cilët do të shprehin verdiktin e tyre në referendum. Janë gjithsej 4 qendra votimi që do të jenë në Pallatin e Sportit, në lokal në qendër të Lazaratit. Në një lokal në Libohovë dhe tek ish-zyra elektorale.
Qarku Korcë ka 9 qendra votimi, ku 2 prej tyre janë në ish-kinematë dhe 1 në qendrën kulturore të fëmijëve.
Në Durrës, 2700 anëtarët e kësaj partie janë ftuar në Pallatin e Kulturës të shprehin me votë vullnetin e tyre, shkruan Ballkan Web.
Dega Krujë, e cila ka rreth 700 anëtarë pritet të votojë në dy qendra votimi, një në Thumanë dhe një në Krujë, ku do votohet në ambjente të mara me qera.
Ndërsa dega e partisë demokratike e Fushë Krujës ka 870 anëtarë. Votimi pritet të zhvillohet te qendra shëndetësore e ku është dhe zyra e partisë.
Në Berat referendumi do mbahet te Pallati i Kulturës.
Në Shkodër ku dera e Partisë Demokratike vijon të jetë e mbyllur me zinxhirë referendumi mbahet në 9 qendra, dy në qytet 7 në njesitë administrative. Shoqata e ish-të Përndjekurve u rendit në mbështetje të rithemelimit të Partisë Demokratike nga ish-kryeministri Sali Berisha.
Në Vlorë janë rreth 1400 anëtarë të PD-së, ku qendra e votimit do të jetë pranë selisë së PD. Ndërkohë nga një qendër votimi do të ketë edhe në Selenice e në Himarë.
DENONCIMET PËR BRAVAT
Në qytetin e Sarandës, gjatë ditës së djeshme, mbështetësit e Berishës denoncuan mbylljen e selisë dhe për pasojë votimi i rreth 500 anëtarëve do të kryhet në një ambient privat.
Mbështetësit e Berishës kanë denoncuar në polici ndërrimin e bravës së derës.
Edhe në Shkodër, selitë e Partisë Demokratike janë mbyllur nga drejtuesit. Në këtë qark janë 9 qendra votimi, dy brenda qytetit dhe pjesa tjetër në bashkinë e Qarkut. Shkodra ka rreth 4 mijë anëtarë.
Nënkryetari i PD-së Shkodër Ndoc Ashta dënoi presionet sipas tij për të mos marrë pjesë në votim.
Ndërkohë që shoqata e ishtë përndjekurve politik të Shqipërisë me qendër në Shkodër deklaruan mbështetjen e plotë të kësaj shoqate për ish-kryeministrin Berisha.
Edhe në Elbasan, janë ndërruar bravat e dyerve të selisë së Partisë, por votimet do të kryhen në këto zyra. Bravat janë ndërruar edhe në Librazhd, Gramsh dhe Përrenjas.
