Kryeministri i Kosovës, Albin Kurti, komentoi ndeshjen Shqipëri-Serbi që përfundoi pa gola. Në një postim në rrjetet sociale, ai tha se me pak më shumë fat, Shqipëria mund të kishte fituar tri pikët.
Kurti shtoi se rezultati i barazuar na la me ndjenja të përziera, por nuk ndryshoi mbështetjen për kombëtaren, e cila sipas tij, luajti më mirë se kundërshtari.
Ai shprehu besimin se në përfundim të fazës së kualifikimeve, Shqipëria do të dalë fituese.
“Pritjet ishin të mëdha, vëmendja gjithashtu! Me pak më shumë fat në fund të pjesës së parë, mund të kishim marrë të tri pikët nga ndeshja. Andaj, barazimi na la të pakënaqur me rezultatin, por jo me kombëtaren, e cila luajti më mirë se kundërshtari i saj. Në fund të këtyre kualifikimeve jemi të bindur se Shqipëria do të triumfojë”, shkruan Kurti.
