Të premten, më 18 korrik, në ambientet e “Shtëpisë së Futbollit”, Federata Shqiptare e Futbollit zhvilloi shortin për sezonin e 87-të të Kategorisë Superiore, i cili starton më 23 gusht 2025 dhe përfundon në maj 2026.
Në këtë edicion do të marrin pjesë 10 skuadra: Egnatia, Vllaznia, Dinamo City, Partizani, AF Elbasani, Teuta, Bylis, Tirana, Vora dhe Flamurtari.
Java e parë rezervon duele interesante, ku bie në sy përballja mes Vllaznisë dhe kampionëve në fuqi, Egnatia, një përsëritje e finales së sezonit të kaluar që përfundoi me fitoren e thellë 0-4 për rrogozhinasit.Po ashtu, Partizani do të presë Vorën, që vjen për herë të parë në elitë. Teuta ndeshet me Dinamon, Elbasani përballet me Flamurtarin e rikthyer, ndërsa në “Adush Muça” Bylisi pret Tiranën.
Skema e re e “Final 4”
Në prag të shortit, FSHF prezantoi një risi të rëndësishme në formatin e kampionatit: një fazë përfundimtare “Final 4”, që do të përcaktojë kampionin dhe ekipet që do përfaqësojnë Shqipërinë në Europë.
Pas 36 javëve të fazës së rregullt, katër skuadrat e para në renditje do të kalojnë në këtë mini-turne final. Pikët e fituara deri në atë moment do të përgjysmohen dhe secila skuadër do të luajë nga tre ndeshje shtesë, me totalin e takimeve që shkon në gjashtë. Të gjitha ndeshjet do zhvillohen në stadiumin “Air Albania”.
Skema e “Final 4”
• Java 1: Vendi 1 vs Vendi 4 / Vendi 2 vs Vendi 3
• Java 2: Vendi 1 vs Vendi 3 / Vendi 2 vs Vendi 4
• Java 3: Vendi 1 vs Vendi 2 / Vendi 3 vs Vendi 4
Renditja përfundimtare në këtë fazë do të përcaktojë jo vetëm kampionin, por edhe skuadrat që do përfaqësojnë Shqipërinë në Kupat e Evropës.
Në rast barazimi pikësh, avantazhin do ta kenë skuadrat që kanë bilanc më të mirë në përballjet direkte, ndjekur nga diferenca e golave.
Rënia nga kategoria dhe play-out
Skuadrat që renditen në vendet 9 dhe 10 do të bien automatikisht në Kategorinë e Parë, ndërsa ekipi i vendit të 8-të do të luajë një ndeshje play-out për të qëndruar në Superligë.
Ky format i ri premton më shumë rivalitet dhe spektakël në garën për titullin dhe për vendet europiane, ndërkohë që sfidat e para të kampionatit pritet të ndezin menjëherë atmosferën në futbollin shqiptar.
