Bregu Perëndimor vazhdon të jetë nën një gjendje të tensionuar, teksa më shumë se 14 palestinezë janë plagosur nga përleshjet me forcat izraelite në fshatin Beita. Përplasjet erdhën si pasojë e një proteste të palestinezëve. Ushtria izraelite tha se dy ushtarë ishin gjithashtu “të plagosur lehtë” në dhunën e të premtes.
Një korrespondent i AFP ka bërë me dije se qindra palestinezë u mblodhën në Beita, e vendosur në veri të Bregut Perëndimor të pushtuar nga Izraeli, për të protestuar për postën e paligjshme të Eviatarit. Zona ka parë demonstrata të rregullta kundër zgjerimit të paligjshëm të vendbanimeve në tokën Palestineze
“Qindra palestinezë hodhën gurë në drejtim të trupave të IDF (ushtrisë), të cilët u përgjigjën me mjete për shpërndarjen e trazirave,” tha ushtria izraelite në një deklaratë, duke shtuar se dy ushtarët “e plagosur lehtë” u dërguan në spital.
Gjysmëhëna e Kuqe Palestineze tha se 146 Palestinezë u lënduan gjatë përleshjeve, duke përfshirë nëntë nga zjarri i drejtpërdrejtë, 34 nga plumbat e veshur me gomë dhe 87 nga gazi lotësjellës.
Kolonët hebrenj ngritën postën e paligjshme Eviatar në fillim të majit, duke ndërtuar shtëpi dhe kasolle rudimentare prej betoni brenda pak javësh. Ndërtimi erdhi në kundërshtim me ligjin ndërkombëtar dhe atë izraelit dhe shkaktoi protesta të ashpra nga palestinezët që këmbëngulën se po ndërtohej në tokën e tyre.
