Beogradi po përgatitet për një tjetër protestë masive këtë të shtunë, e organizuar nga studentët serbë, të cilët po kërkojnë zgjedhje të parakohshme parlamentare dhe po sfidojnë kontrollin e presidentit Aleksandar Vuçiç mbi pushtetin.
Kjo lëvizje vjen pas gati tetë muajsh demonstrata që kanë tronditur qeverinë serbe, të nxitura nga zemërimi publik pas shembjes tragjike të një çatie të sapo rinovuar në një stacion hekurudhor, që u mori jetën 16 personave më 1 nëntor.
Ngjarja e rëndë u bë simbol i dështimeve qeveritare, ku qytetarët fajësuan korrupsionin dhe papërgjegjshmërinë në projektet publike. Kjo shkaktoi një valë pakënaqësie që është përkthyer në protesta të vazhdueshme, me studentët në ballë të kërkesave për ndryshim politik.
Ndërkohë, Vuçiç dhe Partia Progresive Serbe kanë refuzuar kategorikisht thirrjet për zgjedhje të parakohshme, duke akuzuar protestuesit për tentativë për destabilizim të vendit me nxitje nga forca të huaja, pa dhënë detaje.
Protesta e së shtunës përkon me Ditën e Vidovdanit m, një ditë me peshë të madhe historike e simbolike për serbët, që përkujton betejën e vitit 1389 kundër Perandorisë Osmane në Kosovë. Kjo datë shton tensionet në një klimë politike tashmë të trazuar.
Paralelisht, autoritetet kanë ndërmarrë masa parandaluese: disa persona janë arrestuar për dyshime mbi komplot për përmbysje të qeverisë, ndërsa disa shtetas nga Kroacia dhe Mali i Zi janë ndaluar në kufi pa shpjegim.
Kompania hekurudhore ka pezulluar shërbimet pas një alarmi të dyshuar për bombë, gjë që kundërshtarët e qeverisë e shohin si një tentativë për të frenuar pjesëmarrjen në protestë.
