Një sasi droge është gjetur dhe sekuestruar nga policia mbrëmjen e sotme në Portin e Durrësit.
Sasia e drogës nuk është përcaktuar ende, ndërsa mësohet se ishte fshehur në një kamion. Ndër të tjera, bëhet me dije se lënda narkotike është gjegur në një kamion që ishte i mbushur me krom, ndërsa droga u vu re nga policia pas kontrolleve të imtësishme.
Kamioni kishte për destinacion Italinë, ndërsa është ndaluar drejtuesi i mjetit, teksa priten hetime të mëtejshme. Mësohet se operacioni është në vijim,ndërsa nuk ka ende një njoftim zyrtar nga ana e policisë.
Kujtojmë se në portin e Durrësit është sekuestruar disa herë lëndë narkotike. Vetëm në kontenierët e kompanisë “Alba Exotic Fruit”është sekuestruar disa herë kokainë brenda muajve të fundit, ndërsa hera e fundit ishte në 12 tetor. Policia sekuestroi jë sasi prej 10 kilogramë e 185 gramë lëndë narkotike e dyshuar kokainë, teksa në total llogaritet të jënë gjetur rreth 50 kg lëndë narkotike, ndërsa pak ditë më vonë kompania u vendos në sekuestro preventive nga SPAK.
Aktualisht janë duke u kryer hetime për procedimin penal nr.207/2021, regjistruar për veprat penale, “Trafikimi i narkotikëve”, kryer në bashkëpunim të veçantë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
