Seksioni për Hetimin e Krimit Ekonomik e Financiar në Policinë e Vlorës, në bashkëpunim me Prokurorinë e qytetit, kanë sekuestruar në Himarë një truall me sipërfaqe 700 metra katrorë dhe një hotel në ndërtim. Të dy së bashku kapin vlerën rreth 500 000 euro.
Hoteli në ndërtim është sekuestruar pasi leja është dhënë nga bashkia me dokumente të falsifikuara.
Leja për ndërtimin e hotelit është dhënë në 30 korrik të vitit të kaluar, ndaj një shoqërie me përgjegjësi të kufizuara, me administrator shtetasin Ferat Hasa.
Njoftimi i plotë policisë:
Sekuestro Preventive për një hotel në ndërtim dhe truallin ku ndërtohet hoteli në Himarë.
Nga ana e Seksionit për Hetimin e Krimit Ekonomik e Financiar në Drejtorinë Vendore të Policisë Vlorë, në bashkëpunim me Prokurorinë e Rrethit Gjyqësor Vlorë, është bërë zbatimi i Vendimit Penal nr. 1314, datë 20.06.2019, të Gjykatës së Shkallës së Parë Vlorë, për vendosjen e sekuestros preventive mbi një objekt hotel në ndërtim.
Ky ndërtim ka qenë i lejuar me vendimin nr.64, datë 30.07.2018 nga ana e bashkisë Himarë dhe leja e ndërtimit është dhënë në favor të një shoqërie sh.p.k, me administrator shtetasin F. H., si dhe një sipërfaqe toke truall prej 700 m2, e ndodhur në Spile Himarë ku po ndërtohet ky hotel.
Vlera financiare e objektit dhe truallit kap shifrën rreth 500.000 euro.
Ky sekuestrim u bë në kuadër të procedimit penal nr. 342 viti 2019, për veprën penale “Falsifikimi i dokumenteve“ dhe “Shpërdorimi i detyrës” parashikuar nga nenet 186 dhe 248 të Kodit Penal.
