Emri i Admir Muratajt u bë i lakuar nga mediat shqiptare por jo vetëm, pas grabitjes së Rinasit të ndodhur në 9 prill të këtij viti.
Miliona euro u grabitën në pistën e aeroportit ku ende hetimet vazhdojnë edhe pse janë arrestuar 7 persona e një tjetër është në kërkim nga policia. Ditën e sotme mësohet se rreth 1.5 milionë euro pasuri të Admir Murataj, i cili mbeti edhe i pajetë, janë sekuestruar pas vendimit të dhënë nga Gjykata e Shkallës së Parë për Krime të Rënda në Tiranë.
Mësohet se pronat dhe pasuritë e tjera të sekuestruara ishin pasuri që rridhnin nga veprimtaritë kriminale të viktimës. Murataj ishte i njohur për grabitje të tjera dhe arratisje nga burgu në shtetin grek.
Bëhet me dije se janë sekuestruar:
Vilë 3 – katëshe e ndodhur në Prezë, Tiranë, me një sipërfaqe totale ndërtimi 300 m2 në emër të shtetasit A. M.
Tokë truall me sipërfaqe 600.3 m2 e shtetasit A. M., ndodhur afër Saukut,
Garazh me sipërfaqe 23 m2, në emër të shtetasit A. M., blerë në vitin 2016
Apartament me sipërfaqe 100.5 m2, në emër të shtetasit A. M.
Tokë truall, në emër të shtetasit A. M.
Apartament banimi në Sarandë, i porositur në datë 05.07.2012 tek një shoqëri ndërtimi, kundrejt shumës 90 000 euro.
Apartament, me sipërfaqe 71 m2, në emër të shtetases A. A.
9 automjete të llojeve të ndryshme relativisht të shtrenjta.
Vlera e pasurive të sekuestruara llogaritet rreth 1,5 milion euro.
Pasuritë e sekuestruara janë lënë në administrim të Agjencisë së Administrimit të Pasurive të Sekuestruara dhe të Konfiskuara.
Po punohet për identifikimin e pasurive dhe aseteve të tjera që kanë këta shtetas, por që nuk i kanë të regjistruar në emër të tyre.
