Policia e Shtetit ka kryer sekuestrimin e katër pasurive me vlerë totale prej rreth 287,000 eurosh, gjatë operacionit “Origjina”, në kuadër të hetimeve për përfitime nga aktivitet kriminal jashtë Shqipërisë.
Ky operacion u realizua nga specialistët e Seksionit për Hetimin e Pastrimit të Parave dhe Aseteve Kriminale, në bashkëpunim me Agjencinë e Administrimit të Aseteve të Sekuestruara dhe të Konfiskuara, me mbikëqyrjen e Prokurorisë së Tiranës.
Në mesin e pasurive të sekuestruara janë dy apartamente dhe dy automjete, që i përkasin një shtetasi 53-vjeçar, A.L., i dënuar më parë në Itali me 9 vite burg dhe 60,000 euro gjobë për veprën penale të “Shfrytëzimit të prostitucionit” në kuadër të një grupi të organizuar kriminal.
Dyshohet që këto pasuri janë fituar nga aktiviteti kriminal në Itali dhe më pas janë transferuar dhe investuar në Shqipëri.
Dosja procedurale është dërguar pranë Prokurorisë së Gjykatës së Shkallës së Parë të Juridiksionit të Përgjithshëm në Tiranë për vijimin e hetimeve.
