Prokuroria e Tiranës ka sekuestruar gjashtë pasuri të paluajtshme dhe një llogari bankare me vlerë mbi 90 mijë euro në emër të ish-ambasadorit të Shqipërisë në Katar, Edmond Çaça, dhe bashkëshortes së tij.
Vendimi për sekuestrimin u dha më 24 korrik 2025 nga Gjykata e Shkallës së Parë e Juridiksionit të Përgjithshëm, e cila pranoi kërkesën e Prokurorisë për konfiskimin e pasurive të dyshuara si të pajustifikuara dhe të padeklaruara.
Sipas organit të akuzës, hetimet ndaj Edmond Çaçës nisën në vitin 2019, pas kallëzimit të ILDKPI-së, e cila konstatoi mospërputhje dhe mungesë transparence në deklarimet e pasurive për periudhën 2014–2017, kur ai ishte subjekt i detyrueshëm për deklarim.
Prokuroria e akuzon ish-diplomatin për veprat penale të “Fshehjes, mosdeklarimit ose deklarimit të rremë të pasurisë dhe interesave private” si dhe për “Pastrimin e produkteve të veprës penale”. Në vitin 2025, u regjistrua zyrtarisht procedimi pasuror ndaj tij dhe bashkëshortes B.C., bazuar në ligjin për masat parandaluese ndaj pasurisë së personave të përfshirë në krim të organizuar.
Nga hetimet pasurore dhe analizat financiare të kryera, rezultoi se pasuritë nuk justifikohen me të ardhura të ligjshme.
Pasuritë e sekuestruara përfshijnë:
• Dy apartamente, përkatësisht me sipërfaqe 65.5 m² dhe 52.63 m², në emër të Edmond Çaçës;
• Tre pasuri të llojit “pyll”, përfshirë një me sipërfaqe 10,000 m², të kufizuar në favor të çiftit Çaça;
• Një truall, me sipërfaqe totale 8,250 m², ku bashkëshortja figuron bashkëpronare;
• Një llogari bankare në emër të bashkëshortes në “Credins Bank”, me një shumë prej 90,093.76 euro.
Prokuroria thekson se pasuritë janë fituar në mënyrë të dyshimtë dhe se nuk ekziston asnjë dokumentacion bindës që të vërtetojë burimin ligjor të tyre. Në bazë të këtyre fakteve, gjykata vendosi sekuestrimin preventiv të tyre, në pritje të verifikimeve të mëtejshme ligjore dhe hetimore.
