Për herë të parë një përfaqësues i Partisë Demokratike flet hapur për lobimin. Sekretari i Partisë Demokratike, Gazmend Bardhi, nga studio e “Opinion” ka sqaruar kontratën e fundit të lobimit dhe aksionin për Kathleen Ann Kavalec.
Kavalec ishte personi i nominuar nga presidenti Turmp për të qenë ambasadore e SHBA-ve në vendin tonë dhe pikërisht për këtë arsye, Partia Demokratike ka vendosur që të krijojë një fushatë lobimi.
Sipas Bardhit, lobimi është bërë në mënyrë që senatorët amerikanë të bindnin Kavalec për problematikat që Shqipëria ka si çështjet e narkotrafikut, krimit të organizuar dhe kapjes së shtetit, gjë që nuk rezultoi e suksesshme pasi ajo nuk e mori miratimin e senatit për këtë detyrë.
“I kemi kërkuar senatorëve që këto tre çështje të jenë prioritare të ambasadores së re që do vinte në Tiranë. Për këtë lobisti i kompanisë Christian Bourge, ka dërguar për llogari të Partisë Demokratike 6 e-mail, ka kryer 2 telefonata dhe 3 takime me anëtarët e Senatit dhe këshilltarët kryesorë të senatorëve nga Komiteti për Politikën e Jashtme, të cilët kishin mbi tavolina dokumentacionin e kandidaturës së ardhur nga Presidenti Trump për ambasadore në vendin tonë”, tha Bardhi.
