Pas mbylljes së protestës së opozitës së bashkuar ka ardhur edhe reagimi i sekretarit të Përgjithshëm, Gazmend Bardhi për ngjarjet e ndodhura sot gjatë protestës.
Bardhi përmes një postimi në rrjetin e tij social, Twitter ka shkruar se dënon me forcë sulmin që policia ka bërë ndaj qytetarëve, mirëpo veçanërisht ndaj grave dhe fëmijëve që ishin sot në protestë.
“Dënoj me forcë sulmin kriminal të Policisë së Shtetit me mjete të helmimit masiv ndaj qytetarëve, veçanërisht grave dhe fëmijëve në protestë. Kushdo që ka urdhëruar dhe ushtruar dhunë ndaj qytetarëve, në mënyrë të paligjshme dhe kriminale, do të marrë ndëshkimin e merituar!”, tha Gazmend Bardhi.
Opozita e bashkuar protestoi sot, në atë që liderët politikë opozitarë e kanë konsideruar si “protesta më e madhe e tyre”.
Deri më tani, policia ka shoqëruar në komisariat 12 protestues, ku mes tyre është edhe ish-deputeti, Luan Beçi, i cili pati edhe përplasje me policinë për shkak të pretendimit se ishte ushtruar dhunë ndaj djalit të tij.
