Seanca plenare e Kuvendit është mbyllur pas një debati të ashpër mes deputetëve. Kryetarja e Kuvendit, Elisa Spiropali, shpalli përfundimin e seancës, pasi kreu i grupit të PS-së, Niko Peleshi, njoftoi se deputetët socialistë ishin tërhequr nga pikat e rendit të ditës.
Spiropali theksoi se rendi në seancë ishte cenuar seriozisht dhe denoncoi përdorimin e një gjuhe të urrejtjes dhe denigrimit, që ndikon negativisht në shoqërinë shqiptare.
Ajo u bëri thirrje deputetëve të përmbahen në fjalorin e përdorur ndaj njëri-tjetrit dhe të kërkojnë falje për gjuhën e papranueshme.
Ajo shtoi se seanca do të mbyllej dhe pikat e rendit të ditës do të kalonin për diskutim në seancën e ardhshme, ku duhej të shqyrtoheshin me më shumë seriozitet.
