Parlamenti do të mblidhet në seancë plenare të mërkurën në 9 qershor, për të votuar raportin për shkarkimin e presidentit Ilir Meta. Vendimin e mori sot Konferenca e Kryetarëve. Ditën e premte, Komisioni Hetimor miratoi raportin e përpiluar me shkeljet e kryera nga kreu i shtetit.
49 deputetë të Partisë Socialiste kërkojnë shkarkimin e Presidentit Meta për shkelje të Kushtetutës gjatë fushatës zgjedhore. Për të shkarkuar kreun e shtetit, maxhoranca, sipas nenit 88 të Kushtetutës, duhet të marrë jo me pak se 94 vota ose 2/3 e të gjithë deputetëve.
Nëse Kuvendi voton pro shkarkimit të presidentit Ilir Meta, përfundimisht është Gjykata Kushtetuese ajo që vendos nëse gjetjet e Parlamentit, për shkelje të Kushtetues nga presidenti, janë të bazuara apo jo.
NJOFTIMI I KUVENDIT:
“Konferenca e Kryetarëve caktoi datën e votimit të kërkesës për shkarkimin nga detyra të Presidentit të Republikës Nën drejtimin e Kryetarit të Kuvendit, z. Gramoz Ruçi, u zhvillua mbledhja e Konferencës së Kryetarëve.
Konferenca vendosi që seanca plenare për shqyrtimin e kërkesës së një grupi deputetësh për shkarkimin nga detyra të Presidentit të Republikës, të zhvillohet në datën 9 qershor, ditën e mërkurë, në orën 10:00”, shkruhej në njoftimin e Kuvendit të Shqipërisë.
Kujtojmë se burime të sigurta për Gazeta Reforma bënë me dije pak ditë më parë se Komisioni Hetimor Parlamentar do të shkarkojë presidentin Ilir Meta brenda kësaj jave.
