Është mbajtur ditën e sotme në Gjykatën Speciale të Hagës seanca gjyqësore për nënkryetarin e Organizatës së Veteranëve të Luftës së Ushtrisë Çlirimtare të Kosovës, Nasim Haradinaj.
Gjyqi për Haradinaj vjen 4 ditë pas arrestimit të tij më 25 shtator në Kosovë nga Zyra e Prokurorit të Specializuar në bazë të një fletarrestimi dhe urdhri për transferim, të lëshuara nga një gjykatës i Dhomave të Specializuara të Kosovës. Për të dyshuarin është lëshuar fletarrestim për vepra penale kundër administrimit të drejtësisë, përkatësisht për frikësim të dëshmitarëve, hakmarrje dhe shkelje të fshehtësisë së procedurës, të parapara në Kodin Penal të Kosovës.
Ndërkohë gjatë seancës Haradinaj është shprehur se nuk është lejuar të lajmërojë familjen e tij për arrestimin dhe sjelljen në Hagë sipas të drejtave të tij.
“Arrestimi është marrë vesh përmes medieve. Por që kam ardhur këtu nuk kam kontaktuar. Iu kam thanë t’i nxjerri për t’i lajmëruar, kanë thanë kujdesemi na. Uroj të jetë e paqëllimtë megjithatë kështu ka ndodhur. Ishte i hapur mund të shihej, por nuk deshën”, është shprehur Haradinaj.
Më tej ai tha se nuk e njeh Gjykatën Speciale pasi i ka skaduar mandati që më 2 gusht duke shtuar se edhe nëse kjo Gjykatë e dënon me 500 milionë vjet ai sërish nuk e njeh.Madje ai kujton se që në moshën 15-vjeçare është dënuar nga regjimi serb i Millosheviq.
“Nuk e njoh këtë gjykatë dhe nuk do ta njoh, i ka skaduar mandati më 2 gusht. Jam padrejtësisht këtu, keni shkelur Kushtetutën e vendit tim.. Keni thyer të drejtën e mendimit të lirë edhe dënomeni 500 milionë vjet, nuk muj ma hekni mua as njerëzve që mendojnë si unë.Unë për mendimet e lira jam i dënuar në moshën 15 vjeçare nga regjimi i Sllobodan Millosheviqit, luftojmë dhe kemi luftu për të drejtën themelore minimale”, ka thënë Haradinaj.
