Kryeministri Edi Rama dhe në të njëjtën kohë kreu i grupit parlamentar të Partisë Socialiste ndau porositë dhe caktoi drejtuesit politikë në qarqe gjatë takimit të sotëm në Elbasan me anëtarët e këtij grupi.
Gjatë fjalës së tij përpara grupit të Partisë Socialiste, pas mbledhjes që zgjati 90 minuta, Rama i cilësoi humbës kronikë Opozitarët dhe u shpreh se nuk ka ndërmend të thotë asnjë fjalë për ta.
“S’do them asnjë fjalë për kundërshtarët, ata janë humbës kronikë që më mirë se çdo gjë tjetër dinë të gjejnë rrugën e humbjes. Ata janë një fatkeqësi jo thjesht për veten por edhe për ne. Nuk na stimulojnë të përmirësohemi, nuk stimulojnë opinionin publik të mprehë këndvështrimin për ne.
Ne duhet të shohim sa më shumë tek kundërshtarët e padukshëm, tek disa që humbin durimin brenda familjes sonë të madhe, brenda territorit që mbulon gjithë PS për t’i arritur, prekur, kuptuar siç duhet këto ndjesi. Duhet të shohim jo jashtë por brenda, jo rrotull njëri tjetrit por brenda. Kam marrë fjalën e një udhëheqësi të madh kur thotë: Ne këtu paria e PS duhet të pyesim veten se çfarë unë duhet të bëj brenda PS, jo çfarë PS do bëjë për mua. S’ka kohë të rrotullojmë arra nëpër gojë. Çfarë mund të kërkoni më ju nga PS që të jeni gati t’i bëni hyzmet çdokujt që ju ka bërë nder, të jeni përfaqësues në tempullin e demokracisë?”,- vijoi ai.
