Policia e Sarandës ka identifikuar dhe shpallur në kërkim autorin e dyshuar për sherrin e ndodhur mbrëmjen e kaluar në qytetin bregdetar, ku një ish-efektiv policie u godit me tytën e një pistoletë, dhe më pas arma u shkreh në ajër.
Ngjarja ndodhi rreth orës 19:10 në lagjen nr. 4, ku gjatë një konflikti është plagosur ish-policia Adil Veli, 56 vjeç. Ai u dërgua në spital për ndihmë mjekësore dhe ndodhet jashtë rrezikut për jetën.
Nga hetimet paraprake rezulton se gjatë momentit të goditjes, arma është shkrepur aksidentalisht në ajër, pa shkaktuar dëme të tjera. Në vendin e ngjarjes u gjet dhe u sekuestrua një gëzhojë arme zjarri.
Grupi hetimor vijon punën për të sqaruar plotësisht rrethanat e ngjarjes, për të identifikuar dhe kapur autorin, si dhe për dokumentimin ligjor të ngjarjes.
