Ministri i Brendshëm Sandër Lleshaj në një deklaratë për mediat foli për protestën e opozitës së bashkuar. Lleshaj tha se protestuesit kanë hedhur bomba molotov ndaj policisë.
Në një deklarat ë për median Lleshaj tha se me protesta të dhunshme opozita nuk do të bllokojnë dot reformën në drejtësi dhe hapjen negociatave. Ministri i Brendshëm Sandër Lleshaj thotë se personat që kryen akte dhune ditën e djeshme gjatë protestës së opozitës do të marrin përgjigjen e duhur.
Lleshaj tha se nuk justifikon aspak dhunën e ushtruar ndaj policisë. Ai u shpreh se protestuesit janë i njëjti grup që kanë bërë 1997 dhe trazira të tjera, prandaj duhet reflektim edhe nga shoqëria. Lleshaj duke u ndalur te dhuna ndaj ish-funksioniarit demokrat Sait Dollapi, deklaroi se policët mund të duronin edhe pak.
“Policia ishte gjithë kohës në zjarr. Ajo përballoi zjarrin dhe bombat molotov të lëshuara nga masat. Ky është i njëjti grup që ka bërë demonstrata të frikshme dhe 1997. Dhjetëra efektivë policie janë shtruar në spital. Në rastin e dhunës ndaj një ish-funklsionari publik, që u dokumentua edhe në media, policia mund të kishte bërë më mirë. Forcat policore duhet të duronin edhe pak mirëpo, mos harrojmë se policia ndodhej gjithmonë nën zjarr e dhunë. Me protesta të dhunshme nuk do të bllokoni dot reformën në drejtësi dhe hapjen negociatave. Dhunuesit do të marrin përgjigjen e duhur.
Ky është po i njëjti grup, që kur kanë qenë në pushtet kanë vrarë 4 qytetarë në bulevard. Policia ka vepruar me përgjegjshmëri dhe efikasitet ndaj një grupimi që përdori sende të palejuara. Policia dhe qytetarët duhet të jenë sot bashkë kundër një destabilizimi të mundshëm të vendit. Forcat policore dhe qytetarët nuk do lejojnë vandalët që të veprojnë në kundërshtim me ligjin.”- deklaroi Lleshaj.
