Liderët e 47 vendeve dhe organizatave evropiane u mblodhën sot në Tiranë në një samit njëditor të përqendruar te sfidat e sigurisë dhe mbrojtjes në kontinentin europian.
Ndër pjesëmarrësit ishte edhe presidenti ukrainas Volodymyr Zelensky, i cili përmes një postimi në platformën “X” ndau detaje nga bisedimet me udhëheqësit kryesorë ndërkombëtarë.
Zelensky bëri të ditur se, së bashku me presidentin francez Emmanuel Macron, kancelarin gjerman Merz, si dhe kryeministrat Keir Starmer dhe Donald Tusk, kishin zhvilluar një bisedë telefonike me presidentin amerikan Donald Trump.
Në fokus të diskutimit ishte një raund i mundshëm bisedimesh ruso-ukrainase në Turqi, konkretisht në Stamboll.
“Shteti ukrainas është i gatshëm të ndërmarrë çdo hap të shpejtë e të nevojshëm për të arritur paqen e qëndrueshme. Nëse Rusia refuzon një armëpushim të plotë dhe pa kushte, bashkësia ndërkombëtare duhet të reagojë me masa më të forta”, shkroi Zelensky, duke theksuar se presioni ndaj Moskës duhet të vazhdojë derisa ajo të tregojë vullnet për t’i dhënë fund agresionit.
Presidenti ukrainas falënderoi gjithashtu aleatët ndërkombëtarë për mbështetjen e vazhdueshme që po i japin Ukrainës në përballjen me agresionin rus.
