Samiti i Investimeve në Ballkanin Perëndimor 2024, në selinë e Bankës Europiane për Rindërtim dhe Zhvillim po mbahet sot në Londër, ku janë prezent edhe Rama me Kurtin.
Në fjalën e tij, kryeministri i Kosovës, Albin Kuri theksoi fort se shteti i Kosovës është në të njëjtën linjë me SHBA-në dhe Mbretërinë e Bashkuar si në politikë ashtu edhe në biznes.
Në tri vitet e fundit, Kurti tha se janë dyfishuar eksportet dhe investimet e të huajve, por shtoi se nevojiten ende investime të tilla.
Në fund të fjalës së tij, kryeministri i Kosovës tha se diaspora nuk po sjell vetëm remitencat, por edhe etikën e punës dhe dijeninë që kanë, sidomos në Gjermani dhe Zvicër.
“Në këto tri vite kemi dyfishuar si eksportet ashtu edhe investimet e drejtpërdrejta të huaja FDI, na duhen më shumë të tilla por jemi në vend të mirë sepse veçse po kemi këso investime, na duhen ende investime të këtij lloji. Jemi të dedikuar për rendin e ligjit dhe luftimin e korrupsionit në vijë me Amerikën dhe Anglinë, si në vlerat politike edhe në ato të biznesit sidomos pas agresionit rus në Ukrainë që tashmë së fundi ka mbushur dy vjet.
Dhe një element shtesë për të cilin kemi punuar shumë është për ta lidhur tregun e punës me arsimimin profesional në mënyrë që të kemi njerëz më shkathtësi të duhura, me çdo diplomë që jepet në shkollat tona të ofrohet edhe një vend pune.
Kemi nisur këtë projekt në 14 komuna, 21 shkolla, 12 profile të ndryshme dhe këtë e kemi mësuar nga diaspora jonë e fuqishme sidomos në Gjermani dhe Zvicër, që po na i çojnë jo vetëm remitencat por edhe etikën e punës dhe dijeninë që kanë”, tha Kurti.
