Shqipëria do të mirëpresë më 16 maj Samitin e gjashtë të Komunitetit Politik Evropian, i cili për herë të parë mbahet në një vend të Ballkanit Perëndimor.
Takimi zhvillohet në Sheshin Skënderbej në Tiranë dhe do të mbledhë liderët e 47 vendeve evropiane dhe përfaqësues të institucioneve të rëndësishme ndërkombëtare, në një moment me rëndësi strategjike për kontinentin.
Ky samit konsiderohet një njohje për rolin që Shqipëria ka fituar si faktor stabiliteti dhe bashkëpunimi rajonal.
Në prag të tij, më 15 maj, në kryeqytet do të zhvillohet një darkë pune mes drejtuesve të Bashkimit Evropian dhe liderëve të vendeve të Ballkanit Perëndimor.
Ngjarja organizohet nga Presidenti i Këshillit Evropian, António Costa, dhe kryeministri Edi Rama, nën moton:
“Evropa e re në një botë të re: unitet – bashkëpunim – veprim i përbashkët”. Në samit do të marrin pjesë edhe Presidentja e Komisionit Evropian Ursula von der Leyen, Përfaqësuesja e Lartë për Politikën e Jashtme Kaja Kallas, si dhe përfaqësues nga NATO, OSBE dhe Këshilli i Evropës.
Në qendër të Tiranës është ngritur “Shtëpia e Europës”, një strukturë simbolike që do të presë delegacionet, ndërsa nxënës shqiptarë kanë kontribuar me punime artistike mbi vizionin e tyre për të ardhmen e Evropës.
Samiti do të fokusohet në katër boshtet kryesore:
• Siguria dhe qëndrueshmëria demokratike, me vëmendje te mbështetja për Ukrainën dhe lufta ndaj ndërhyrjeve të jashtme;
• Konkurrueshmëria dhe siguria ekonomike, përmes inovacionit dhe tranzicionit të gjelbër;
• Migrimi, lëvizshmëria dhe rinia, si sfidë dhe mundësi për të ardhmen e Evropës;
• Lidershipi evropian në një botë në ndryshim, për të garantuar një rol më të vendosur ndërkombëtar.
Në sfondin e krizave globale, luftës në Ukrainë dhe sfidave të reja teknologjike, Tirana kthehet për një ditë në epiqendrën e dialogut dhe vizionit strategjik të Evropës.
Axhenda e Samitit (16 maj):
• 10:00 – Mbërritja e liderëve dhe pritja
• 11:00 – Ceremonia zyrtare e hapjes
• 11:30 – Foto familjare
• 11:45 – Seanca e parë plenare
• 13:00 – Dreka zyrtare
• 14:30 – Tryeza tematike me grupe pune
• 15:45 – Takime bilaterale
• 17:30 – Mbyllja e seancës plenare
• 18:30 – Konferencë për shtyp me kryeministrin Edi Rama dhe kryeministrin e Danimarkës.
