Deputeti Ervin Salianji ka mbajtur një fjalim para mbështetësve të mbledhur para Kryeministrisë. Ai u shpreh se kemi ‘mbërritur në ditën ku vetëm Shqipëria dhe Serbia e Vuçiç-it nuk bëjnë zgjedhje të ndershme’. Ai shtoi se ‘e vetmja gjë që e mban në pushtet Ramën është indiferenca, mpirja e njerëzve, frika dhe përçarja për të cilën sot i kemi dhënë përgjigje me bashkim’.
“Sot nga kjo protestë i kemi treguar regjimit dhe kemi çuar në çdo shtëpi dritën e shpresës. Për Shqipërinë keni bërë më shumë se në 10 vite ka bërë çdo institucion. Pas rënies së regjimit komunist, pas rënies së diktaturës, askush nuk e kishte menduar se do duhej të mblidheshim prapë. Rilindja e Edi Ramës na mësoi se s’mund t’i marrim të mirëqenia normat europiane.
Sot kemi arritur në ditën ku intelektuali u zëvendësua me të fortin e zonës për t’i siguruar vota. Mbërritëm në ditën ku vetëm Shqipëria dhe Serbia e Vuçiçit nuk bëjnë zgjedhje të ndershme. Erdhën në kohën kur kryeministri ka bashkëpunëtorët në burg për korrupsion dhe vetë shfaqet si të jetë i pastër dhe pa asnjë mëkat.
Të dashur miq, ky kryeministër nuk ka miq, aleatë e partner, sepse nuk mund të pranojnë një shtetar si ky. E vetmja gjë që e mban në pushtet është indiferenca, mpirja e njerëzve, frika dhe përçarja për të cilën sot i kemi dhënë përgjigje me bashkim”, tha Salianji.
