Pasditen e sotme kreu i Partisë Demokratike Sali Berisha tha se qeveritarët ditën dhe natën vetëm falsifikojnë, djegin dhe shkatërrojnë dokumente. Berisha komentoi deklaratën e kreut të Kadastrës Artan Lame, i cili tha se ka probleme në zonat në zhvillim e sipër. Sipas Berishës, Lame tregoi qartë projektin e qeverisë për të vjedhur dhe faktoi se është kriminel i përmasave të paimagjinueshme.
Gjithashtu Berisha u shpreh se në vitin 2013 në Kadastrën e Tiranës është lënë çdo gjë e digjitalizuar, madje dhe me certifikimin e Bankës Botërore. Sakaq, kreu i PD deklaroi se Lame e tha hapur se kanë një projekt për të përvetësuar pronat e shqiptarëve.
“Para tre ditësh doli shefi i kadastrës Artan Lame në televizion. Renditi me dhjetëra probleme me të cilat tregonte se kadastra nuk ekziston më, se tapitë fabrikohen te Rruga e Kavajës. Në Kadastrën e Tiranës në 2013 çdo gjë në mënyrë absolute është lënë e digjitalizuar dhe ai me atë dëshmi që ka bërë, ka faktuar se është një kriminel i përmasave të paimagjinueshme. Zbuloi një projekt të këtyre hajdutëve në pushtet për tu vërsulur mbi pronat e qytarëve shqiptarë, por jo, arkiva digjitale është intakte. E certifikuar nga BB si një nga veprimtaritë më të suksesshme dhe është bërë në fakt nga një grup IT shqiptar. Fatmirësisht miqtë e mi ai kishte në epiqendër kadastrën e Tiranës, ai projekt. Nuk është e gjithë Shqipëria, kto, është gjithçka digjitale. Artan Lame tregoi projektin që kanë për të përvetësuar pronat e shqiptarëve. Probleme të mëdha tha ka në zonat në zhvillim e sipër. Asnjë problem nuk ka kadastra ju garantoj me përgjegjësi të plotë, përveç problemit që qeveritarët duan të vjedhin. Filluan me djegien e dokumenteve në Sarandë, prisni kur të vazhdojë në të gjithë bregun,“-tha Berisha.
Më 18 qershor, drejtori i Agjencisë Shtetërore të Kadastrës Artan Lame ka dalë në një konferencë për shtyp, nga ku tha se nga regjistrat e Kadastrës së Tiranës mungojnë 515 faqe dhe 180 të tjera janë të grisura por, sipas tij, nuk mungojnë as faqet e tjetërsuara. Sipas Lames, përgjegjësi mbajnë të gjithë kryeministrat. Edi Rama ende nuk ka komentuar, ndërsa Berisha e tha sot fjalën e tij.
