Kreu i Partisë Demokratike, Sali Berisha, nuk është paraqitur këtë të hënë në Prokurorinë e Posaçme, ndonëse ishte i detyruar nga masa e sigurisë “detyrim paraqitje” të miratuar nga Gjykata në kuadër të hetimeve për çështjen “Partizani”.
Mungesa e tij është justifikuar me arsye shëndetësore.
Burime pranë PD bënë të ditur se Berisha po përballet me një gjendje gripale dhe, për këtë arsye, vizita e planifikuar në ambientet e SPAK është anuluar.
Mbështetës të tij dhe disa deputetë të grupit parlamentar demokrat ishin mbledhur pranë zyrave të SPAK në pritje të ardhjes së tij, por më pas u njoftuan se ai nuk do të paraqitej.
Nuk dihet ende nëse për shkak të kësaj gjendjeje shëndetësore, Berisha ka anuluar edhe angazhimet e tjera të ditës, përfshirë konferencën e zakonshme për mediat dhe pjesëmarrjen në seancën plenare të Kuvendit.
Për momentin, nga selia blu nuk ka asnjë njoftim zyrtar për axhendën e mëtejshme të tij.
