Në Tiranë kanë mbetur për t’u numëruar më pak se 8 mijë vota të Diasporës, ndërsa një mandat parlamentar vijon të jetë në balancë mes Partisë Mundësia dhe Partisë Demokratike.
Të dhënat e fundit nga KQZ tregojnë se janë hapur 34,579 zarfe nga gjithsej 42,384 vota të ardhura nga jashtë vendit.
Duke përfshirë edhe votat brenda Shqipërisë, Partia Socialiste mban një avantazh prej 62 mijë votash ndaj Partisë Demokratike dhe deri më tani ka siguruar 19 mandate në qarkun e Tiranës.
Në raport me votën e Diasporës, Partia Demokratike ka siguruar 32.68%, një përqindje që përfaqëson një rënie prej 2.2% krahasuar me rezultatin që ka marrë brenda territorit shqiptar.
Nga ana tjetër, Partia Mundësia ka marrë 5.01% të votave në Shqipëri dhe 4.72% të votave të Diasporës.
Sipas formulës së shpërndarjes së mandateve, PD-së i nevojiten rreth 800 vota shtesë nga votat e mbetura për të përmbysur rezultatin dhe për t’i marrë mandatin Partisë Mundësia.
