Nuk ka ende asnjë të dhënë zyrtare nga ana e Ministrisë së Shëndetësisë në lidhje me shifrat zyrtare te vaksinimit të popullsisë në vendin tonë. Prej dy ditësh tashmë ka filluar edhe vaksinimi masiv, megjithatë shifrat bëhen publike vetëm në profilin ne Facebook te ministres Ogerta Manastirliu ose të kryeministrit Edi Rama. Edhe Shefja e Epidemiologjisë në Institutin e Shëndetit Publik, Silva Bino nuk ka dhënë një shifër konkrete për sa i përket vaskinimit. Në emisionin “Open” ajo ka thënë se janë vaksinuar rreth 3% e popullatës, ndërsa mundësitë janë që të bëhen 15 mijë vaksinime në ditë. Bino tha se me dozat që janë në dispozicion mund të arrihet edhe në vaksinimin e 12% të popullatës, ndërsa ka pohuar se për të gjitha vaksinat që janë në Shqipëri ka pasur edhe refuzime.
“Kemi vaksinuar rreth 3% të popullatës. Mundësitë i kemi që të bëjmë rreth 15 mijë vaksinime në ditë. Vaksinimi është i kombinuar në qendra të përqendruara dhe në pika të hapura kastile për vaksinim. Për qytetarët, dhe në vendet e punës, dhe në qendra shëndetësore. Të gjitha këto e përshpejtojnë vaksinimin. Me kaq doza sa kemi, mund të kapim vaksinimin e 12% të popullatës. Për të gjitha vaksinat ka refuzime”, ka thënë Bino.
