Ndërkohë që Shqipëria nuk ia doli ta fitonte arbitrazhin me Francesco Becchettin dhe për pasojë duhet t’i paguajë 110 milion euro biznesmenit italian, Kosova arriti të fitonte gjyqin me Devollin duke i kursyer shtetit një “gjobë” prej 45 milion eurosh. Si ka mundësi që kjo gjykatë të cilën kryeministri Rama këtë të premte e quajti të padrejtë, të manipuluar, madje arriti deri aty sa tha se Shqipëria do të heqë dorë nga juridiksioni i saj, i jep të drejtë Kosovës. Ndoshta faji ka qenë me të vërtetë i qeverisë, sepse Kurti nuk ka pasur më shumë miq se Rama që fitoi gjyqin.
“Ministria e Drejtësisë, përmes Avokaturës Shtetërore së bashku me ekipin mbrojtës të Squire Patton Boggs kanë arritur fitoren e radhës për Kosovën në arbitrazhin ndërkombëtar, duke mposhtur pretendimet e Blerim Devollit kundër Republikës së Kosovës. Përmes një padie të dorëzuar pranë Gjykatës Ndërkombëtare të Arbitrazhit pranë Dhomës Ndërkombëtare të Tregtisë në mars të vitit 2020, z.Devolli kishte kërkuar kompensim prej së paku 45 milionë euro nga Republika e Kosovës si pasojë e pretendimeve për shpronësimin e Dardafon.net, operatorin e rrjetit celular virtual në Kosovë, pronë kjo e z.Devolli. Pak ditë më parë, Tribunali ndërkombëtar i Arbitrazhit ka lëshuar vendim duke hedhur poshtë në tërësi pretendimet e z. Devolli dhe duke urdhëruar këtë të fundit t’ia paguajë Republikës së Kosovës mbi 1.3 milion euro në emër të shpenzimeve të procedurës”, shkroi Kurti ditën e djeshme.
Gazetari Klodian Tomorri nuk ka kursyer ironinë mbi këtë çështje dhe shprehet se do ishte ideale nëse do të kishte merkato politikanësh.
“Ky po ua merr kompanitë, ua kthen popullit dhe u fiton dhe gjyqet. Ky yni nuk u merr asgjë dhe ne na rrasin kollomoqin nga 120 milionë euro. Pse nuk ka dhe merkato kryeministrash si puna e futbollistëve? Për shembull i kishim dhënë 200 milionë euro Kosovës ne dhe kishim blerë këtë një vit për kryeministër të Shqipërisë se dilnim me fitim vetëm nga arbitrazhet. Këtë tonin e jepnim borxh dy sezone me ndonjë vend tjetër,” shkruan ai.
