Organet e Vetting do të vijojnë punën e tyre edhe gjatë vitit 2021, dhe këto do i kushtojnë shumë taksapaguesve shqiptarë.
Në projekt buxhetin e parashikuar për vitin e ardhshëm, Këshilli i Ministrave ka parashikuar rreth 11 milionë dollarë për dy komisionet e Vetting-ut, Komisionerit Publik, Inspektorin e Lartë të Drejtësisë dhe për SPAK.
Inspektori i Drejtësisë, i cili është ende në proces ngritje dhe kërkon plotësim me staf, do të ketë në dispozicion rreth 2.5 milionë dollarë.
Komisioni i Pavarur i Kualifikimit ka të parashikuar një buxhet prej rreth 2 milionë dollarë, ndërsa 1.3 milionë dollarë janë parashikuar për Kolegjin e Posaçëm të Apelimit.
Rreth 600 mijë dollar është parashikuar buxheti i Komisionerit Publik.
Pjesën më të madhe e zë buxheti për Strukturën e Posaçme Antikorrupsion, që pritet të jetë 5 milionë dollarë. SPAK pritet të plotësohet edhe me numrin e prokurorëve, por edhe me 60 oficerët gjyqësorë të Byrosë Kombëtare të Hetimit. Hetuesit janë në fazat e fundit të përzgjedhjes, dhe punën do e nisin vetëm pas trajnimit në SHBA.
Me ligjin e ri për organet e drejtësisë, anëtarët e këtyre komisioneve përfitojnë paga që shkojnë në rreth 300 mijë lekë në muaj, të cilat përbëjnë edhe pjesën kryesore të kostove buxhetore për këto institucione.
/Burimi: Scan/GazetaReforma.com/
