Mjeku Pëllumb Pipero ka qenë mbrëmjen e sotme i ftuar në ‘Open’ ku ka ndarë të tjera informacione rreth Coronavirusit e ndër të tjera tha se virusi nuk transmetohet në rrugë gastrointestinale, por nëpërmjet spërklave të pështymës.
I pyetur nëse COVID-19 merret nëpërmjet produkteve të hapura të bulmetit, bukës, apo ashensorit Pipero e mohoi, duke u shprehur:
“Ky virus nuk transmetohet në rrugë gastrointestinale. Deri tani nuk ka prova, edhe mundet por nuk ka prova. Ndonjëherë mjafton dhe një prekje dhe transmetohet. Edhe nëse rri në dhomë më një të infektuar transmetohet. Ka studime që dëshmojnë se COVID-19 qëndron në ajër.
Nga përdorimi i ashensorit nuk transmetohet, por nëse butonat janë prekur nga një person me Coronavirus, edhe mundet. Prandaj them lani duart shpesh. Pas çdo gjëje që prekni lani duart”, u shpreh mjeku.
A qëndron virusi në tokë apo në asfalt ?
“Virusi jeton nga 3 orë deri në disa ditë. Shpërndahet me spërkla, jo nëpërmejt objekteve”, tha ai, ndërsa për radhët në markete për të marrë ushqime shtoi “ Do këshilloja qytetarët t’i ndalojnë vatjten në dyqanet me grumbuj njerëzish. Të respektohet distanca tre metra si në Itali.”
Ndër të tjera, Pipero tha se nuk dëshiron që të hap panik, por gjithsecili nga ne mund të jetë i infektuar, pavarësisht nëse ka shenja apo jo.
“Nuk dua të panikos. Potencialisht gjithsecili nga ne mund të jetë i infektuar, pavarësisht nëse kanë shenja apo jo. Qytetarët duhet të zbatojnë këshillat, nuk duhet të shohin shifrat. Asnjë nuk duhet që të vijë në spital”.
Deri tani në vendin tonë janë infektuar 51 persona dhe është shënuar një viktimë, teksa mes të prekurve janë edhe 8 mjekë.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
