Ish-ministrja e Integrimit, Majlinda Bregu ka zhvilluar një “intervistë” me ndjekësit e saj në Instagram. Një prej tyre, duke ironizuar Lulzim Bashën, e ka pyetur sa bëjnë 7 herë 7. Bregu është përgjigjur po me ironi, “Jo të gjithë që kanë mbaruar në Sami Frashëri High School kanë mbetur deri në mbledhje, zbritje”. Kujtojmë këtu se Basha dhe Bregu kanë mbaruar shkollën e mesme në të njëjtën kohë në gjimnazin Sami Frashëri në Tiranë
Ndarja e Bregut me Bashën mori përmasë publike në maj 2017, para zgjedhjeve të atëhershme, kur ajo e kritikoi për bojkotin e parlamentit.
Bregu theksonte se “Vendimet për të bojkotuar parlamentin, për të mos hyrë në zgjedhje por dhe vendimi për ta refuzuar paketën e kompromisit që propozuan miqtë tanë të Partive Popullore Evropiane, u mor pa u konsultuar me askënd”
Bregu shprehet se Partia Demokratike ka marrë pjesë në zgjedhje edhe në vitin 1997, ku shumë prej kandidatëve të saj nuk hynin dot fizikisht në zonat e tyre elektorale. Ajo shton se pavarësisht përpjekjes për të ndikuar tek Partitë Popullore Evropiane, ata tashmë thonë se “ju nuk doni të ndihmoni veten”.
“U bë qëkur s’mbahet mend që grupi parlamentar i PD-së nuk mblidhet për të dëgjuar dhe për t’u dëgjuar nga kryetari i partisë. Zgjedhja për të bojkotuar parlamentin u bë pa i lënë kohë një debati real. Megjithatë e kam përkrahur edhe çadrën edhe protestën civile të qytetarëve si formën më demokratike për të kthyer vëmendjen e të gjithëve tek çështja e zgjedhjeve të lira e të ndershme. Kam kërkuar disa herë edhe në takimet me kryetarin e Partisë mbledhjen e grupit parlamentar demokrat. Vendimmarrjen e një grupimi politik e di institucion po aq të rëndësishëm sa dhe vendimin e gjithkujt për të dëgjuar ndërgjegjen e tij. Shpresa e madhe e disa të fajshmëve se martesa e interesit të Edi Ramës me Ilir Metën do përfundonte me divorc dhe nga divorci do rrëzohej qeveria, u tret si flluskë sapuni”. Deklaronte Bregu.
Siç dihet, dy javë më vonë Basha do të bënte marrëveshjen famëkeqe të 17 majit me Ramën.
Më vonë, Bregu mori detyrën në Këshillin Rajonal të bashkëpunimit të Vendeve të Ballkanit të Perëndimor me qendër në sarajevë. E pyetur përse Basha nuk e kishte uruar për detyrën e re, ajo do të shprehej: “Nuk më ka shqetësuar, nuk e pres, nuk e kërkoj, nuk më bëhet vonë. Urimin e pres nga miqtë. Ka kaq shumë hipokrizi rrotull sa nuk më shqetëson fare kjo gjë”.
/Gazetareforma.com/
