Pas më shumë se dy muajsh luftë Rusia nuk po ndalet në masakrat e saj ndaj popullit të Ukrainës.
Trupat e tre burrave janë gjetur në një gropë në afërsi të Buchas, aty ku disa javë më parë u shënua një nga masakrat më të mëdha që prej nisjes së luftës.
Trupat janë gjetur një ditë më parë dhe thuhet se janë një tjetër dëshmi e krimeve të luftës që rusët po aplikojnë në Ukrainë.
“Duart e viktimave ishin të lidhura, sytë i kishin të mbuluara dhe iu kishin zënë gojët. Ka gjurmë torture në kufoma”, thotë Policia.
Moska ka mohuar ndonjë krim të kryer në Bucha, e cila ishte nën kontrollin e brigadës së 64-të të këmbësorisë së
motorizuar për më shumë se një muaj në fillim të luftës.
Ukraina ka nisur një “gjueti” për 10 ushtarë rusë të akuzuar për krime lufte në Bucha, ndërsa organet ndërkombëtare kanë nisur hetimet ndaj Putinit dhe Rusisë, pikërisht për këto krime.
Kujtojmë që fotot nga masakra në Bucha të Ukrainës, ku qindra kufoma shihen të shtrirë në rrugë pas tërheqjes së ushtrisë ruse nga atje, kanë bërë xhiron e botës me opinionin publik të shokuar nga një mizori e tillë.
Presidenti i SHBA Joe Biden i bëri thirrje Vladimir Putinit që të përballet me gjyqin për krimet e luftës në Ukrainë.
