Ngjarja të cilës i frikësohej e gjithë bota, tashmë ndodhi, Rusia ka nisur pushtimin e Ukrainës nga Donbasi duke shkaktuar shtatë të vrarë dhe nëntë të plagosur deri më tani.
Ndërkohë ministri i Jashtëm i Ukrainës, Dmytro Kuleba, është shprehur këtë mëngjes se Rusia nisi pushtimin e vendit të tij. Në një postim në Twitter, Kuleba shkroi se presidenti rus, Vladimir Putin ka nisur “pushtimin e Ukrainës në shkallë të plotë dhe se bota mund dhe duhet ta ndalë Putinin”. Presidenti i Ukrainës, Volodymyr Zelenskyi tha se Rusia ka kryer sulme me raketa në infrastrukturën e Ukrainës dhe mbi rojet kufitare.
Ai shtoi se ka biseduar me aleatët perëndimorë dhe se u ka bërë thirrje atyre që ta ndihmojnë Ukrainën me mbrojtje dhe financa.
Theksojmë se CNN ka dëshmuar, se trupat mbi një kolonë automjetesh ushtarake që hynë në Ukrainë nga një pikë kufitare me Bjellorusinë. Raportohet se ka shpërthime në të paktën shtatë qytete. Shpërthime dhe të shtëna me armë u raportuan në Kiev dhe qytete të tjera.
Nga ana tjetër presidenti rus konfirmoi se ka nisur, siç tha një operacion “special” për “çmilitarizimin” e Ukrainës.
Të shtëna me armë zjarri u dëgjuan pranë aeroportit kryesor “Boryspil” në Kiev, menjëherë pasi Rusia njoftoi për operacionin, bëri të ditur agjencia e lajmeve Interfax, duke cituar mediat lokale.
