Shumë shtete do të presin gjatë në radhë për të përfituar një sasi vaksinash për popullatën e tyre, në një kohë që pandemia do të vijojë.
Po ashtu edhe shumë kompani po presin miratimin nga OBSH-ja për prodhimet e tyre, me qëllim që të nisin lidhjen e kontratave për vaksinat anti-Covid.
Në garë me kohën janë edhe shtete të mëdha dhe të fuqishme si SHBA-të, Gjermania, Franca etj., por duket se Rusia dhe Britania e Madhe nuk kanë humbur asnjë minutë kohë për të rigjetur normalitetin.
Në Moskë prej ditësh së nesërme do të nisë fushata e vaksinimit masiv kundër koronaviusit. Lajmi u bë i ditur nga kryetari i bashkisë së kryeqytetit rus, Serghei Sobyanin, me anë të një njoftimi në blogun e tij, raporton sot “RT”.
“Në koordinim me qeverinë, ne fillojmë të ofrojmë takime në internet për punonjësit e arsimit dhe shëndetësisë, si dhe punonjësve të shërbimeve sociale në qytet nga dita e nesërme”,- tha Sobyanin.
“Lista (se kush mund të vaksinohet) do të zgjerohet në javët e ardhshme kur të mbërrijnë grupe të reja të vaksinës. Qendrat e vaksinimit do të hapen në 5 Dhjetor”,- tha Sobyanin.
Sipas studiuesve të Institutit “Gamaleya”, që ka punuar për vaksinën ruse, “Sputnik V”, ajo është 91,4% efektive, bazuar tek të dhënat e marra nga personat 28 ditë pas dozës së parë dhe 7 ditë pas dozës së dytë.
Në 24 orët e fundit në Rusi, janë regjistruar 28145 raste të reja me Covid, numri më i lartë që prej nisjes së pandemisë, sipas të dhënave të qendrës operative anticovid.
Të infektuarit deri tani në Rusi janë 2.375.546 persona. Ndërsa të vdekurit në 24 orët e fundit janë 554, duke e çuar në 41.607 numrin total të viktimave, raporton “BBC”.
Po ashtu edhe Britania e Madhe, do të nisë të martën që vjen procesin e vaksinimit kundër koronavirusit të ri.
Kështu bëri të ditur shefi i Shërbimit Kombëtar Shëndetësor, Chris Hopson, i cili tha për “BBC” se, të martën do bëhen dozat e para.
Ai tha se procesi i imunizimit nuk është një sprint, por do jetë një maratonë. “Gara do të nisë të martën”,- i deklaroi ai “BBC”.
Britania ka porositur 40 milionë vaksina, që do të thotë se, 20 milionë njerëz do vaksinohen me nga dy doza.
Kamionët me vaksina kanë mbërritur dje në Britani. Fillimisht ato do depozitohen nëpër laboratorë dhe spitale. Të parët në radhë për vaksinim do jenë personat mbi 80 vjeç dhe punonjësit e qendrave të kujdesit.
Në kulmin e gjithë kësaj trazire prej pandemisë, një debat i madh ka nisur në shumë shtete që presin rekomandimet nga OBSH-ja për të përzgjedhur llojin e vaksinës dhe se kur duhet të nisin me procesin e vaksinimit.
Por dy udhëheqësit e qeverive ruse dhe asaj britanike, duket se e shpërfillën OBSH-në, ndërkohë që sipas mediave ndërkombëtare ata konsiderohen nëpër sondazhe, “si liderët më të sukseshëm dhe më duhurit për vendet e tyre”.
/Burimi: BBC/ Përshtati: GazetaReforma.com/
