Presidenti rus Vladimir Putin ka kërcënuar hapur Perëndimin, në rast se lejojnë Ukrainën që të përdorë raketa me rreze të gjatë veprimi kundër tyre. Gjatë një deklarate të bërë këtë të enjte, Putin reagoi mbi pretendimet se Perëndimi po lejon Zelensky-n që të urdhërojë sulmet me raketat me rreze të gjatë, të marra nga shtetet Perëndimore. Sipas tij, nëse Perëndimi do të lejonte diçka të tillë, atëherë vendet e NATO-s do të ishin në luftë me Rusinë dhe se Moska do të marrë vendimet e duhura.
“Nëse Perëndimi do të lejonte që Kievi të përdorte armë me rreze më të gjatë për të goditur objektivat ruse, kjo nënkupton se vendet e NATO-s janë në luftë me Rusinë dhe Moska do të marrë ‘vendimet e duhura’’-tha Putin.
Ditën e mërkurë, (11 shtator) sekretari amerikan i Shtetit, Antony Blinken së bashku me sekretarin e jashtëm të Mbretërisë së Bashkuar, David Lammy, gjatë një vizite në Kiev, tha se Shtetet e Bashkuara të Amerikës janë gati që t’i japin dritën jeshile Ukrainës për të lëshuar raketa me rreze të gjatë veprimi për të goditur Rusinë.
