Më shumë se një muaj luftë tashmë kanë kaluar dhe ndërkohë që negoaciatat mes palëve akoma nuk kanë një “dritë jeshile”, Rusia vazhdon pa mëshirë sulmet në zona të ndryshme të Ukrainës.
Së fundmi Rusia ka sulmuar një spital në Ukrainë duke vrarë të paktën një person dhe plagosur disa të tjerë. Lajmi është konfirmuar nga guvernatori i Rubizhne, që ishte dhe vendi ku ndodhi sulmi.
“Një predhë armike goditi Spitalin Rubizhne”, u shpreh Sergiy Gaiday.
Gaiday tha se janë duke kërkuar informacionet për identifikimin e viktimave.
Ai postoi një foto të ekipeve të shpëtimit duke kërkuar në rrënoja. Kujtojmë që të shtunën pas tërheqjes së trupave ruse, në qytetin ukrainas Bucha u evidentuan vrasje barbare.
Sekretari i Përgjithshëm i NATO-s, Jens Stoltenberg tha se vrasjet ishin “brutalitet kundër civilëve që nuk e kemi parë në Evropë për dekada”.
“Është e tmerrshme dhe është absolutisht e papranueshme që civilët të jenë në shënjestër dhe të vriten”, tha ai për CNN.
Sekretarja e Jashtme e Mbretërisë së Bashkuar Liz Truss tha se sulmet pa dallim kundër civilëve ukrainas në qytete si Bucha dhe Irpin duhet të hetohen si krime lufte.
“Ne nuk do të lejojmë Rusinë të mbulojë përfshirjen e saj në këto mizori përmes dezinformatave cinike dhe do të sigurojmë që realiteti i veprimeve të Rusisë të dalë në dritë”, tha ajo.
Sekretari amerikan i shtetit Antony Blinken i përshkroi imazhet nga Bucha të tmerrshme gjithashtu.
