Rumania do t’i dhurojë Shqipërisë 150 mijë doza të vaksinës anti-Covid. Vendimi është miratuar në mbledhjen e sotme të qeverisë rumune, ndërsa lajmin e ka bërë me dije Sekretari i Përgjithshëm i Partisë Socialiste, Taulant Balla.
Balla i shpreh mirënjohjen presidentit rumun Klaus Iohannis dhe Kryeministrit Florin Cîțu për këtë ndihmë të mirëpritur në luftën ndaj pandemisë. Ai falenderon gjithashtu ambasadorin e Rumanisë në Tiranë, Octavian Șerban me të cilin thotë se kemi një bashkëpunim të përditshëm në dobi të marrëdhënieve të shkëlqyera mes dy vendeve.
“Qeveria e Rumanisë sapo ka miratuar në mbledhjen e sotme të Qeverisë vendimin për t’i dhuruar Shqipërisë 150.000 doza vaksinë anti-Covid19. Dëshiroj t’i shpreh mirënjohjen Presidentit Klaus Iohannis dhe Kryeministrit Florin Cîțu për këtë ndihmë të mirëpritur në luftën me pandeminë.
Gjithashtu falenderoj edhe Ambasadorin e Rumanisë në Tiranë Octavian Șerban me të cilin kemi një bashkëpunim të përditshëm në dobi të marrëdhënieve të shkëlqyera mes dy popujve dhe vendeve tona”, shkruan Balla.
Ndërkohë, në vendin tonë janë kryer deri tani më shumë se 1 milionë e 200 mijë vaksinime, ndërsa vaksinimi i hapur për të gjithë qytetarët mbi 18 vjeç do të vazhdojë përgjatë gjithë muajit gusht. Po ashtu rastet me Covid kanë ardhur në rritje për shkak edhe të variantit Delta.
