Seanca e sotme parlamentare ka nisur me replika ndërmjet kreut të konservatorëve, Kujtim Gjuzit dhe kryetarit të Kuvendit, Gramoz Ruçi.
Gjuzi ka paralajmëruar incidente, nëse Ruçi nuk i jep të drejtën të flasë.
Shkak janë bërë episodet e seancës së kaluar, kur kreu i konservatorëve kërkonte të replikonte me kryeministrin Edi Rama, pasi ky i fundit i përmendi emrin.
“Mos më ndërprisni fjalën, se pastaj do ta marrim me zor dhe pastaj mund të ndodhin incidente. Këtu na kanë sjellë marëveshjet që keni bërë. Kur me përmendet emri kam të drejtën të bëj replikë dhe ju nuk ma ndaloni këtë”, iu drejtua Gjuzi, Ruçit.
Ndërkohë kreu i Kuvendit sqaroi se nuk është shkelur në asnjë pikë rregullorja.
Më tej ai i bëri me dije Gjuzit se pavarësisht se i bëri 3 herë vërejtje, nuk e përjashtoi nga seanca.
“Nuk është shkelur në asnjë pikë rregullorja e dhënie e fjalës së askujt deputeti. Herën e kaluar ka pasur për ju mbi 3 herë vërejtje. Nuk ju përjashtova nga seanca për shkeljen e rregullores për ndërhyrjet që keni bërë. Nuk duhet ta përsërisni”, tha Ruçi.
