Në Konferencën e Sigurisë në Mynih, Sekretari Amerikan i Shtetit, Marco Rubio, përcolli një mesazh të drejtpërdrejtë për Europën: aleanca me Shtetet e Bashkuara mbetet thelbësore, por vendet europiane duhet të jenë më të përgatitura për të mbrojtur veten.
Rubio vlerësoi partneritetin historik mes SHBA dhe Europës, duke theksuar se lidhja transatlantike ka qenë shtylla e stabilitetit për dekada me radhë. Megjithatë, ai bëri të qartë se administrata e Presidentit Donald Trump kërkon një riformatim të mënyrës se si funksionon kjo aleancë.
“Ne duam aleatë që mund të mbrojnë veten, në mënyrë që asnjë kundërshtar të mos ndihet i prirur të sfidojë forcën tonë kolektive”, deklaroi Rubio para liderëve dhe ekspertëve të sigurisë.
Sipas tij, Europa duhet të marrë më shumë përgjegjësi përballë kërcënimeve rajonale dhe globale, në vend që të mbështetet në mënyrë disproporcionale tek ndihma amerikane. Ai theksoi se një aleancë e fortë ndërtohet mbi partnerë të barabartë, të aftë dhe të vendosur për të mbrojtur interesat e tyre.
“Ne duam aleatë që janë krenarë për kulturën e tyre, trashëgiminë e tyre… dhe së bashku me ne janë të gatshëm dhe të aftë ta mbrojnë atë”, u shpreh ai.
Në fjalën e tij, Rubio përdori edhe një ton më të fortë politik, duke deklaruar: “Sepse ne në Amerikë nuk kemi interes të jemi kujdestarë të sjellshëm dhe të rregullt të rënies së menaxhuar të Perëndimit. Ne nuk kërkojmë të ndahemi, por të rigjallërojmë një miqësi të vjetër”.
Ai shtoi se, ndonëse SHBA është e përgatitur të veprojë e vetme nëse është e nevojshme, zgjedhja e parë mbetet bashkëpunimi me Europën. “Ndërsa jemi të përgatitur, nëse është e nevojshme ta bëjmë këtë vetëm, kjo është preferenca jonë dhe shpresa jonë ta bëjmë këtë me ju, miqtë tanë këtu në Europë”.
Në fund, Rubio theksoi lidhjen e thellë mes dy anëve të Atlantikut. “Ne i përkasim njëri-tjetrit”, tha ai, duke nënvizuar rëndësinë e partneritetit shumëvjeçar që ka kaluar edhe periudha tensioni, veçanërisht gjatë mandatit të dytë të Presidentit Trump.
Ai pranoi se SHBA mund të jetë ndonjëherë “e drejtpërdrejtë dhe urgjente në këshillin tonë”, por siguroi se administrata aktuale mbetet e përkushtuar ndaj aleancës me Europën, me synimin për ta forcuar dhe përshtatur atë me sfidat e reja globale.
