Banorët e fshatit Hot i Ri në njësinë Rrethina, Shkodër, kanë protestuar kundër gjendjes së rënduar të rrugës së tyre, e cila prej 30 vitesh nuk është rikonstruktuar.
Rruga e amortizuar, me gropa dhe ujë, ka krijuar vështirësi të mëdha në qarkullim, veçanërisht për një person me aftësi të kufizuara që banon në këtë zonë. Një tjetër problem i madh për ta mbetet mungesa e ndriçimit rrugor.
Banorët paralajmërojnë bojkot të zgjedhjeve parlamentare të 11 majit nëse kërkesat e tyre nuk merren parasysh.
“Nëse rruga nuk rregullohet, nuk kemi arsye të votojmë. Ne votojmë për një të ardhme më të mirë për fëmijët tanë”, shprehet njëri prej tyre.
Pavarësisht denoncimeve të mëparshme, situata nuk ka ndryshuar, duke prekur rreth 1 mijë banorë që e përshkojnë këtë rrugë çdo ditë.
