Prej ditësh Greqia, ashtu si një pjesë e madhe e shteteve, ka nisur betejën e ashpër kundër Coronavirusit, e mbrëmjen e djeshme dha shpresa për të gjithë pasi pacientja ‘zero’ u shërua plotësisht.
Greqia jep lajmin e mirë! Pacientja ‘zero’ dhe i biri 9-vjeçar fitojnë betejën ndaj Coronavirusit
Mirëpo, ditën e sotme situata ka ndryshuar pasi numri i të prekurve ka pësuar një rritje të papritur, duke shkuar në 133 të infektuar.
Mësohet se vetëm gjatë ditës së sotme janë shënuar 34 raste të reja, teksa u regjistrua edhe viktima e parë, i cili ishte një 66-vjeçar, i shtruar që nga 2 marsi në spitalin Rio, në afërsi të qytetit të Patras.
Mes të infektuarve janë edhe 4 shqiptarë nga Saranda, por gjendja e tyre nuk është bërë e ditur ende.
Ndërkohë, në vendin tonë janë shënuar deri tani 23 persona, teksa qeveria ka marrë masa të rrepta.
Në rang botëror, janë shënuar 130,180 të infektuar dhe 4,755 viktima në 125 vende të botës.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
