Në Greqi numri i të infektuarve dhe viktimave nga Covid-19 po rritet çdo ditë e më shumë e kjo ka bërë që zona e 
Atikës të futet në lockdown. Autoritetet greke kanë vendosur që lockdawn-i të nis nesër nga ora 06:00 deri në 28 shkurt.
Përveç kësaj do të mbyllen sërish në Athinë dhe në Atikë shkollat fillore dhe të mesme, të gjitha kompanitë dhe dyqanet, përveç supermarketeve, njësitë ushqimore, farmacitë.
Ndërkohë, qarkullimi do lejohet vetëm për arsye madhore, me mesazh sms nga celulari për 6 lëvizje të caktuara, vizitë mjekësore, blerje ushqimesh, takime urgjente në sektorin publik, ndihmë urgjente ndaj njerëzve në nevojë, ceremoni mortore të familjarëve më të afërt dhe shëtitje me kafshët shtëpiake. Ndërkohë po diskutohet ende rasti i Selanikut pasi edhe aty është situata alarmante.
Në 24 orët e fundit në Greqi janë shënuar 1526 raste të reja me COVID19, prej të cilave 750 raste u zbuluan në Atikë, 206 në Athinë dhe pjesa tjetër në zonat e tjera të vendit. Sakaq janë shënuar 20 viktima, duke e çuar numrin e përgjithshëm të jetëve të humbura që prej fillimit të pandemisë në 6017 në total.
Mosha mesatare e viktimave është 79 dhe pjesa më e madhe e tyre kanë pasur sëmundje shoqëruese. Aktualisht në intubim po trajtohen 277 pacientë.82.5% e pacientëve të intubuar janë të moshës mbi 70 vjeç.
