Situata e rëndë e pandemisë në vendin tonë është “kronikë e një ngjarjeje të parajamëruar”. Kështu e ka quajtur drejtoresha e Institutit të Shëndetit Publik, Albana Fico gjendjen në të cilën ka hyrë vendi ynë nga COVID-19- Në një lidhje skype në emisionin Real Story ajo ka thënë se jemi në një moment delikat, por mund të ndërhyet për të marë masa të reja. Fico është shprehur se janë shtuar gjithashtu virozat e frymëmarrjes dhe duhen mbajtur në konsideratë. Ajo gjithashtu ka thënë se qytetarët i dhanë shumë liri vetes, prandaj jemi në një situatë të tillë ku numrat janë rritur në mënyrë të konsiderueshme. Kujtojmë që ditët e fundit në vendin tonë shifrat e COVID-19 i kanë kaluar 1 mijë raste në ditë. Në 24 orët e fundit u regjistruan 1143 raste.
Pjesë nga intervista e Albana Ficos:
“Ka një dyndje të jashtëzakonshme. Numrat kanë ndryshuar dhe kjo është diçka shqetësuese. Jemi në një moment delikat, por mund të ndërhyhet për të marrë masat e reja. Janë shtuar virozat respiratore, është tjetër rrezik që duhet mbajtur në konsideratë. Kemi kronikë të një ngjarje të paralajmëruar, për bizneset, qendrat tregtare, por në raste edhe qytetarët, i dhanë lirinë vetes, për të ardhur ku jemi. Situata ka ardhur në numra të konsiderueshëm. Duhet të kemi më shumë kujdes, të respektojmë masat ndaj koronavirusit”, tha Fico.
