Ditën e sotme u rikthye shqetësimi sepse numri i rasteve të reja me Covid-19 të raportuara nga Ministria e Shëndetësisë ishte 25.
Por, sipas mjekut Pëllumb Pipero kjo shifër nuk është shqetësuese, për sa kohë situata në spitale mbetet e qëndrueshme.
Në një intervistë për ‘Opinion’, infeksionisti ritheksoi se është koha të hapemi dhe se ekspozimi tashmë nuk e shqetëson.
Rastet pozitive nuk më shqetësojnë, ekspozimi nuk më shqetëson, më shqetëson vetëm ruajtja e masave. Ky është një sinjal që qytetarët dhe ekspertët të mos e harrojnë se virusi është mes nesh. Në fund të fundit ne do bashkëjetojmë me të, për disa muaj, ndoshta një vit ose edhe më shumë.
I pyetur se tashmë që po bashkëjetojmë me Covid-19, nga kush duhet të ruhemi më shumë, Pipero u shpreh se duhet të ruhemi nga vetja dhe se duhet të tregohemi shumë të vëmendshëm.
Mjeku bëri thirrje të shmangen kontaktet me personat e tjerë dhe muhabetet sepse kjo përbën rrezik të lartë.
Duhet t’i ruhemi vetëm vetes. Askujt tjetër, Si? Duke treguar kujdes dhe duke mbajtur distancat sociale. Jam dakord që mund të takoni njerëzit e afërt, por mos qëndroni gjatë me ta. Sipas studimeve mes një të sëmuri, asimptomatiku, një që tështin dhe një që bën muhabet, ai që bën muhabet është më i rrezikshmi, sepse spërklat e përshtymës përbëjnë rrezik të lartë për kontaminim.
Mjeku tha se ndonëse kemi 3 muaj ‘të pushtuar’ nga koronavirusi dhe kemi mësuar ende, nuk mund të themi me siguri nëse tashmë e kemi fituar imunitetin e tufës apo jo.
Pipero dha edhe një mesazh për qytetarët, duke iu bërë thirrje të bëjnë edhe pak durim, por shumë kujdes.
